Nassuiarnera: Sooq atuartarpugut? Qanga atuartitaanerup qanoq issimanera takorloorsinnaaviuk? Qanoq ingerlasarsimassava? Taamanikkut suna pingaartinneqarpa? Inooriaaseq ullumikkumut sanilliullugu qanormita allaanerussuteqarsimava? Angerlarsimaffimmi suliassanut ikiuunnerusarsimanerlutik, soormita? Siunissamimita suup ilikkarnissaa pingaaruteqarumaarpa? Ilinniartitsisuusimasoq Helena Jensen tusarnaariarsiuk, qanga atuartitaaneq qanoq issimanersoq oqaluttuarissavaa.

Helenap qanga atuartitaaneq takutillugulu oqaluttuarissavaa, sammisaqartinneqarlusilu pinnguaatissaasi, qangatut, taamaalillusilu aanaa/aataa aamma angajoqqaassi atuartuusimanerat misigissallugu. 1. - 3. klassenut ingerlassassaavoq nuannerlunilu ilikkagaqarnartoq.

Siunertaq

Ingerlatsinermi uani atuartut piffissami utimut angalatinneqarput.

Siunertaa: sooq atuartarnersugut, atuarfimmilu ilinniakkagut inuiaqatigiinnut qanoq sunniuteqarnersut atuartunut ilinniartitsissutiginissaa. Atuarfik atuartitaanerlu piffissap ingerlanerani qanoq allanngorsimava?

Aanaa/aataa aamma angajoqqaat atuartitaanerisa nalaanni atuartitaaneq qanoq ingerlasimanersoq atuartut paasisaqarfigaat, eqqarsaatersuutiginissaalu ilinniarlugu namminneq atuartitaanerminnut sanilliullugu. Oqaluttuarisaaneq angajoqqaallu aanaa/aataakkullu nalaanni inuunerup samminissaanut periuseq nuannersoq.