”Nuutoqqamut takornariarneq”.

1.-7. klassemi atuartunut Nuutoqqami takornariartitsineruvoq. Takornariarnermi atuartut oqaluttuunneqassapput, qanoq ilillutik  Nuummi suut tamarmik aallartissimanersut.

Hans Egedep nalaaniit pisut ullumikkumut oqaluttuarineqassapput, aataakkut 1950’ikkunni inuunerat tikillugu, illoqarfiup allanngoriartorfiani.

Illut isiginnaarneqassapput, sunut atorsimanersut oqaluttuarineqassaaq, aammalu illut sunik oqaluttuassartaqarnersut tusarnaarneqarsinnaalluni. Hans Egedep eqqaassutissaa alakkassavarput, Sassuma Arnaa eqqartussavarput, eqqaassutissat takussavagut immaqalu  illutoqqanut iserluta qanoq inneri maluginiassavagut,  uunnassiutigaluta.

Atuartut katersugaasivimmut uterunik suliassinneqassapput, suliassaq atuartup ukiuinut piffissaliunneqartumullu naleqqussagaassaaq.

Malugalugu: Atuartut takornariarnermi oqortunik atisaqassapput, peqataaniaraannilu sapaatip akunnera sioqqullugu inniminniisoqassaaq.

Siunertaq

Taamatut neqerooruteqarnikkut katersugaasiviup kissaatigaa atuartut najukkamik oqaluttuassartaannik ilisimasaqalersinneqarnissaat, aammalu atuartut qanga maannakkullu inuuneq pillugu eqqarsaateqarsinnaalernissaat.

Uummaarissumik illoqarfiup oqaluttuassartaata atuartunut ammaassiffigineratigut, illoqarfitsinni pisarsimasut oqaluttuassartaannik ilisimannilerneq anguneqassaaq, taamatullu siunissaq pillugu takorluuisinnaanermik pilersitseqataassalluni. Anguniagaavoq atuartut eqqarsaatersuutigilissagaat inuiaqatigiinni suut pingaartinneqarnersut, taamaasillutillu qanga maannakkullu pissutsit assigiinngissutaannik assigiissutaannillu eqqarsaatiginnilersinnaallutik. Nuutoqqami takornariarnikut, paasisatik tunngavigalugit angajoqqaatik aataakkutillu qanga inuuneq, maannakkullu inuuneq oqaloqatigiissutigisinnaalissavaat.


  • Sammisassat:
  • Illut
  • Oqaluttuaq
  • Kinaassuseq
  • Nuuk
  • Ineriartorneq
  • Inuiaqatigiit/Inuiaat