Marriorneq ”Nunatsinni uumasut” 4.-6. klassinut tulluartoq marloriarluni Illorpumi marriorfimmut takkunnikkut ingerlanneqassaaq. Marriortitsineq marriortumit Lena Olsenimit ingerlanneqassapput.

Nutaaliorsinnaaneq, nuannisarneq, pinnguarnissaq tiguartissinnaanerlu tassani periarfissaqassapput. Atuartut sammisamut "Nunatsinni uumasut"-nut nammineq isumassarsiatik malillugit suliaqassapput. Isumassarsiorfissaannik uumasut assinginik nivinngaasoqassaaq.

Takkuteqqaarnermi marraq namminneq nunatsinni uumasunik takorluuineq naapertorlugu ilusilersorneqassaaq, assilissanillu isumassarsiortoqarsinnaalluni.

Takkunnerup tulliani sanaaq iluaqutaasinnaanngorlugu suliarineqassaaq.  Qanoq atuartut sanaartik ulluinnarni atorsinnaanersoq pillugu assersuusiortoqassaaq. Assersuutigalugu aqerluusanut ilitsivik imaluunniit naneruuteeraasivik sananeqarsinnaassapput.

Atuartut assatik atorlugit marraq ilusilersussavaat, tullianilu takkukkunik sanaartik qalipassavaat.

Takkuteqqinnermi suliat naammassisat qaqugukkut aaneqarsinnaanissaat isumaqatigiissutigineqassaaq.

Klassi marlunngorlugu avinnissaanut periarfissaqarpoq, taamaalilluni klassimi peqataarusuttut tamarmik peqataanissaminnik periarfissillugit.

Malugiuk: Workshoppi sivikinnerpaamik sapaatip akunnera sioqqullugu Workshoppeqarnissaanut inniminnerneqassaaq.

Siunertaq

Uani workshoppimi atuartut marraq atorlugu suliaqarsinnaaneq ilinniassavaat, kiisalu marraq atortussianngorlugu eqqumiitsuliaraluguluunniit suliarisinnaanerlugu ilinniassallugu.  Atuartut namminneq assatik atorlugit nutaaliorsinnaanertik misilittagaqarfigilissavaat, inuttut ineriartorfigisaminnik.


  • Sammisassat:
  • Atortussiat
  • Iluaqutaasinnaasut
  • Kalaallit Nunaanni uumasut
  • Marriorneq
  • Nutaaliorsinnaaneq
  • Marraq